Хатынь, Чарнобыль і Няміга -
Адчай і слёзы херувіма,
Пакуты й боль людзей, народу,
Да смерці ў вечнасць шлях-дарога
Хатынь, Чарнобыль і Няміга -
Чаканне маці свайго сына,
Труна на тысячы галоваў,
Жалоба сэрцаў, уздым да Бога
Хатынь, Чарнобыль і Няміга -
Пякельны подых, твар агіды,
За грэшны час нам пакаранне,
Дарунак смерці - ратаванне
Хатынь, Чарнобыль і Няміга -
Усё ты вынесла, Радзіма,
Агонь і атам, цісканіну,
Дзіцячы крык і страляніну
Хатынь, Чарнобыль і Няміга -
Памылкі нашы, нашы хібы,
Жывых малітвы па памерлых,
Ікона тысячам палеглых
Хатынь, Чарнобыль і Няміга -
Абліччы д'ябла ва ўспамінах,
Адказ на многія пытанні,
Пра сілу смерці і кахання