Вершы беларускіх паэтаў

Нацыянальны паэтычны партал

Уваход

Раiм наведаць


Каб дадаць спасылку
на Ваш сайт, пiшыце ў
зваротную сувязь

Лічыльнікі

Пушчанскі спеў

Сярэдняя: 5 (1 голас)

Налібоцкая пушча, хваёвы лес,
Ты празрысты кляштар карабельных сосен.
Павучок на прадплечча бярозкі ўзлез,
Зачапіўшы за павуцінне восень.
Пералікам песень тваіх бароў
Нам лапоча струмень развітаннем познім.
І далёкі чуецца роў зуброў,
Які мы з сабою напэўна возьмем…

Ты штодня пісала наш дзіўны лёс:
І калісьці тут у тваім бярлогу
Нараджаўся ў люты зімы мароз
Сын мядзвежы, падобна да сына Бога.
А вясною ён да Смаргонскіх груд
Бег спаткаць жыцця маладога волю –
І трапляў у мядзеведніцкі свет пакут,
Каб пад нечы бубен танчыць – ад болю…

Так і кожны, каму Госпад волю даў
Не паспее з бярлога да неба выйсці,
Як патрапіць у яму, ды будзе там
На рашотцы распаленай абяз выйсця.
І як вогнішча стане чырвоніць прут,
Закіпіць яго кроў і журба ашчэрам –
Але што можа ён, нараджоны тут
Меншым, чым мядзведнік ягоны, зверам?..

Налібоцкая пушча! Сцяжына вось
Па якой і нам дападаць да пасткі.
Але ёсць справядлівасць і вера ёсць,
І яшчэ не чуваць апраметнай ляскат.
Ды і што бы там далей не было,
Мы паспелі зведаць дзень сонца летні,
Мы паспелі ўбачыць Хрыста святло –
І не выпаліць гэтага ў нас мядзведнік.