Свеце мой, не ляці ў бяздонне.
Свеце мой, азірніся — чуеш?
Недзе ў Жывы святой на ўлонні
Сонцавіт малады начуе.
Свеце мой, не крані маною
Сонцавітавы песні-крылы.
Над зямлёй, нада мной анёлаў
абярожная літасць-міла.
Свеце мой, ночадзеню любы!
Валадару смугі й ясноты.
He аддай, не прадай на згубу
Сонцавітавай дрогкай ноты.
Свеце мой, узыходны раю,
паступае сумніў да сэрца.
Жах на роспачным хісткім краі,
на сумежжы любові й смерці.
Свеце мой, Краю мой балесны,
мой адзіны праўдзівы Божа,
Сонцавітавай гордай песні
хай цямнота-пустэль не зможа.
Свеце мой, не згарай у крыўдзе.
Адары маю сцежку верай.
Сонцавіт не заблудзіць, прыйдзе —
разнасцежу насустрач дзверы.