Ноччу я чую - крокам таропкім
Блукаюць у цемры далёкія продкі;
Сьцежак шукаюць, голасна клічуць...
Што ім патрэбна ў маёй рэчаіснасьці? -
Скрыбава? Мсьцібава? Сцікс, альбо Нёман? -
Колькі стагодзяў і колькі плямёнаў:
Дзітва, яцьвягі, жамойты, ліцьвіны, -
Продкам маім ці ня быў Гідэмінас?
Гвалціў Міндоўг і крыжак асяроддзе, -
Карэнні мае у чыім радаводзе?
Ноччу балюча сьціскае мне горла, -
Што непакоіць краіну памёрлых?
Ім: караімам, габрэям, яцьвягам, -
Што ім патрэбна? - Рэштка увагі?
Памяці рэштка пра тыя плямёны? -
Ці -
ладзяць за мною човен Харона?...