Успомні маленькім сябе
На руках
У маці і ў бацькі –
Вазьмі сябе ў рукі!
Успомні падлеткам сябе
На руках
У дрэва і ў рэчкі –
Вазьмі сябе ў рукі!
Дзіцятка малое
На рукі вазьмі,
Яму усміхніся –
Вазьмі сябе ў рукі!
Свяшчэннай зямліцы
Ў далоні вазьмі
З магіл сваіх блізкіх –
Вазьмі сябе ў рукі!
Каб вынесці мукі
І выйсце знайсці,
І радасць – нарэшце –
Вазьмі сябе ў рукі!
Каб потым і ўнукі
Шчасліва пайшлі –
Сабой кіраванне
Вазьмі ў свае рукі!