Вершы беларускіх паэтаў

Нацыянальны паэтычны партал

Уваход

Раiм наведаць


Каб дадаць спасылку
на Ваш сайт, пiшыце ў
зваротную сувязь

Лічыльнікі

Прыйшоў нарэшце студзень

Сярэдняя: 5 (3 галасоў)

Прыйшоў нарэшце студзень.
Мяцеліца ў двары…
Вось радасці ўжо будзе
Мясцовай дзетвары.

Віруе сівер снежна,
Праз шчыліны пішчыць…
Бялёсае бязмежжа…
Сняжыць, сняжыць, сняжыць.

На вуліцы - нікога.
Спужанае шчаня
Нос туліць да старога
Таполевага пня.

Нічыйнае? Ці можа
Адбеглася з двара
Знямоглага, старога
Свайго гаспадара?

Няма варон, сінічак.
Замёў кармушку снег.
Бабуля кошку кліча
Праз фортачку ў вакне.

Хлапчук цягае санкі
Пад горку, як стары,
Каб хоць разок скаціцца
З высокае гары.

Зіма. Халодны студзень,
Але жыццё бяжыць…
Падманнае бязлюдззе…
Сняжыць, сняжыць, сняжыць…

© Copyright: Людмила Воронова Супрун, 2020
Свидетельство о публикации №120080403152