Магіслаў. Такое імя далі магілёўцы свайму новаму сімвалу горада.
Трубач у сінім сурдуце усталяваны ў гарадской ратушы...
Там, дзе ратуша цягнецца ў неба
І прызыўны гадзінніка звон,
Выйдзе хлопчык з фанфараю меднай
На высокі ажурны балкон.
Не шукайце ні міфаў, ні казак,
Не давесці нам, не даказаць,
Чый загад для яго абавязак:
Гараджанам фанфару зайграць?
Можа, гэта наказы нашчадкам,
З даўніны запавет землякоў,
Каб мы ўсе ад нягод і нападкаў
Зберагалі сівы Магілёў?
Спёку жвава віхура развее,
Восень з лісця сатчэ дываны,
А трубач-сімвал міру і веры,
Абвяшчае прыходы вясны.
Над Дняпроўскай далінаю гукі,
Нарастаюць, працягла ляцяць…
Што дзяды завяшчалі – унукі
Здольны свята ў душы захаваць.