Я раскажу тут, як умею:
Спяшаўся Воўк на асамблею,
Дзе гор, лясоў і стэпаў жыхары
З якой пары
Не могуць між сабою пагадзіцца.
I марыў шэры не спазніцца,
Але, мінуўшы грэчку,
Сустрэў авечку
(Відаць, адбілася ад статка).
— Непарадкі! —
Гаворыць воўк, пусціўшы сліну. —
Ты парушаеш дысцыпліну!
Чаго ты швэндаешся тут?
А ну, хадзем за мною ў суд!
I, збочыўшы з дарогі, шэры
Авечкай добра павячэраў.
Пасля з трыбуны асамблеі
Шкадуе Воўк авечак, млее:
— Па мне, жывое ўсё жыві!
А пыса ўся яго ў крыві.
_________________________________
Мы ведаем драпежнікаў такіх,
Што смерць нясуць і рабства для народа.
На словах, дык яны за мір і за свабоду,
А пысы у крыві у іх.